ആരാണ് നന്ദൻ നിലേകണി? പരീക്ഷാ പരിഷ്കാരത്തിന് പ്രധാനമന്ത്രി തിരഞ്ഞെടുത്ത ടെക് വിദഗ്ധൻ

രാജ്യത്തെ പരീക്ഷാ സംവിധാനം കൂടുതൽ സുതാര്യവും വിശ്വസനീയവും സാങ്കേതികവിദ്യ അധിഷ്ഠിതവുമാക്കാൻ രൂപീകരിച്ച ഉന്നതതല ടാസ്‌ക് ഫോഴ്സിന്റെ അധ്യക്ഷനായി പ്രധാനമന്ത്രി നരേന്ദ്ര മോദി തിരഞ്ഞെടുത്തത് ഇൻഫോസിസ് സഹസ്ഥാപകനായ നന്ദൻ നിലേകണിയെയാണ്. പരീക്ഷാ പരിഷ്കാരത്തിനായുള്ള നിർദേശങ്ങൾ സമർപ്പിക്കുകയാണ് ഈ സമിതിയുടെ ചുമതല. 

1955 ജൂൺ 2-ന് ജനിച്ച നന്ദൻ നിലേകണി, 1981-ൽ ഇൻഫോസിസ് സഹസ്ഥാപിക്കുകയും പിന്നീട് കമ്പനിയുടെ സിഇഒയും നിലവിൽ നോൺ-എക്സിക്യൂട്ടീവ് ചെയർമാനുമായി പ്രവർത്തിക്കുകയും ചെയ്തു. ഇന്ത്യയുടെ ഡിജിറ്റൽ പൊതുമേഖലാ അടിസ്ഥാനസൗകര്യങ്ങളുടെ വളർച്ചയിൽ നിർണായക പങ്കുവഹിച്ച വ്യക്തിയാണ് അദ്ദേഹം. 

2009 മുതൽ യുണീക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (UIDAI)യുടെ ആദ്യ ചെയർമാനായിരുന്ന നിലേകണി, ആധാർ പദ്ധതിക്ക് നേതൃത്വം നൽകി. ആധാർ, ഡിജിറ്റൽ ഐഡന്റിറ്റി, പൊതുസേവനങ്ങളിൽ സാങ്കേതികവിദ്യയുടെ ഉപയോഗം എന്നിവയിൽ അദ്ദേഹത്തിന്റെ അനുഭവം പരിഗണിച്ചാണ് പരീക്ഷാ സംവിധാനത്തെ ആധുനികവത്കരിക്കുന്ന ദൗത്യം സർക്കാർ അദ്ദേഹത്തെ ഏൽപ്പിച്ചതെന്നാണ് വിലയിരുത്തൽ.