നിയമസഹായം തേടിയ യുവതിക്ക് നേരെ ലൈംഗികാതിക്രമം

ന്യൂഡൽഹി: ലൈംഗികാതിക്രമക്കേസിൽ മുൻ ഗവൺമെൻ്റ് ഓഫ് കേരള ഹൈക്കോടതി പ്ലീഡർ പി ജി മനുവിൻ്റെ മുൻകൂർ ജാമ്യാപേക്ഷ സുപ്രീം കോടതി തള്ളി. പത്ത് ദിവസത്തിനകം മനു കീഴടങ്ങണമെന്നും കോടതി നിർദേശിച്ചു. കീഴടങ്ങിയ ശേഷം അഭിഭാഷകനെ മജിസ്‌ട്രേറ്റിന് മുന്നിൽ ഹാജരാക്കണം. അന്നുതന്നെ ജാമ്യാപേക്ഷ പരിഗണിക്കാനും കോടതി നിർദേശിച്ചു. ഹൈക്കോടതി ജാമ്യാപേക്ഷ തള്ളിയതിന് പിന്നാലെയാണ് പിജി മനു സുപ്രീം കോടതിയെ സമീപിച്ചത്.

നിയമസഹായം തേടിയ യുവതിയെ പീഡിപ്പിച്ചെന്നാണ് മുൻ സീനിയർ സർക്കാർ പ്ലീഡർക്കെതിരെയുള്ള കേസ്. 2018ൽ നടന്ന കേസുമായി ബന്ധപ്പെട്ട് കഴിഞ്ഞ ഒക്ടോബറിലാണ് പരാതിക്കാരി അഭിഭാഷകനെ കാണാനെത്തിയത്.

പിന്നീട് കടവന്ത്രയിലെ ഓഫീസിലും പരാതിക്കാരൻ്റെ വീട്ടിലും യുവതിയെ ഭീഷണിപ്പെടുത്തുകയും പീഡിപ്പിക്കുകയും ചെയ്തിരുന്നതായി പറയുന്നു. അനുമതിയില്ലാതെ പരാതിക്കാരിയുടെ സ്വകാര്യ ചിത്രമെടുക്കുകയും ഫോണിലേക്ക് അശ്ലീല സന്ദേശം അയയ്ക്കുകയും ചെയ്തതിന് അഭിഭാഷകനെതിരെ ഐടി ആക്ട് പ്രകാരമാണ് കേസെടുത്തിരിക്കുന്നത്.

എന്നാൽ പരാതിക്കാരൻ പറയുന്ന പെരുമാറ്റം തൻ്റെ ഭാഗത്തുനിന്നുണ്ടായിട്ടില്ലെന്നും, തൊഴിൽമേഖലയിലെ എതിരാളികളുടെ ബോധപൂർവമായ നീക്കത്തിൻ്റെ ഭാഗമാണ് കേസെന്നും മനുവിൻ്റെ മുൻകൂർ ജാമ്യാപേക്ഷയിൽ പറയുന്നു. റൂറൽ എസ്പിക്ക് ലഭിച്ച പരാതിയിലാണ് മനുവിനെതിരെ കേസെടുത്തത്. കേസ് രജിസ്‌റ്റർ ചെയ്‌തതോടെ മനു മുതിർന്ന സർക്കാർ പ്ലീഡർ സ്ഥാനം രാജിവച്ചു.