ലഹരിവിരുദ്ധ പോരാട്ടവുമായി ഡെറാഡൂണിലെ സ്ത്രീകൾ; രാത്രിയിൽ തെരുവുകളിൽ ഗസ്തി

ഡെറാഡൂൺ: ഗ്രാമത്തിലേക്ക് ലഹരിവസ്തുക്കൾ തേടി ആളുകൾ എത്തുന്നതിൽ പ്രതിഷേധിച്ച് ഡെറാഡൂണിലെ താനി ഗ്രാമത്തിലെ സ്ത്രീകൾ സ്വയം രാത്രിഗസ്തി ആരംഭിച്ചു. കഴിഞ്ഞ രണ്ട് മാസമായി രാത്രികാലങ്ങളിൽ സംഘം ചേർന്നാണ് സ്ത്രീകൾ ഗ്രാമത്തിലെ വിവിധ ഭാഗങ്ങളിൽ നിരീക്ഷണം നടത്തുന്നത്. 

ലഹരിവസ്തുക്കൾ തേടിയെത്തുന്നവർ രാത്രിയിൽ വീടുകളുടെ വാതിലുകളിൽ മുട്ടുന്നതും ഇതുമായി ബന്ധപ്പെട്ട് പ്രദേശത്ത് തർക്കങ്ങൾ ഉണ്ടാകുന്നതുമാണ് സ്ത്രീകളെ ഗസ്തിക്ക് പ്രേരിപ്പിച്ചത്. പ്രശ്നം പൊലീസിന്റെ ശ്രദ്ധയിൽപ്പെടുത്തിയെങ്കിലും തുടക്കത്തിൽ രണ്ട് ദിവസത്തോളം മാത്രമാണ് പൊലീസ് ഗസ്തി നടത്തിയതെന്ന് സ്ത്രീകൾ പറയുന്നു. തുടർന്ന് ഗ്രാമത്തിന്റെ സുരക്ഷയ്ക്കായി തങ്ങൾ തന്നെ രംഗത്തിറങ്ങുകയായിരുന്നു. 

ലഹരിയുടെ ഉപയോഗവും ഇതുമായി ബന്ധപ്പെട്ട സാമൂഹിക പ്രശ്നങ്ങളും പ്രദേശത്ത് വർധിക്കുന്നതായുള്ള ആശങ്കകൾക്കിടെയാണ് സ്ത്രീകളുടെ കൂട്ടായ ഇടപെടൽ. ഗ്രാമത്തിലെ സമാധാനവും സുരക്ഷയും ഉറപ്പാക്കുന്നതിനൊപ്പം അധികൃതരുടെ അടിയന്തര ഇടപെടൽ ആവശ്യപ്പെട്ടുമാണ് ഇവരുടെ പ്രവർത്തനം.

സ്ത്രീകളുടെ നേതൃത്വത്തിലുള്ള ഈ കൂട്ടായ്മ പ്രദേശത്ത് ശ്രദ്ധ നേടുകയാണ്. ലഹരിവിരുദ്ധ പ്രവർത്തനങ്ങളിൽ പ്രാദേശിക സമൂഹത്തിന്റെ പങ്കാളിത്തത്തിന്റെ ഉദാഹരണമായാണ് നടപടിയെ വിലയിരുത്തുന്നത്.